من قلب الميدان ....طارق الموجى يكتب :صرخة الميدان

بسم الله الرحمن الرحيم

تلك القصيـــدة التى كتبــها الشاعر الشاب "طارق الموجى " تعبــر عن الميدان وما به واصرار النــاس على رحيــل الطاغيــة المخلوع "مبــارك " آخــر مرة القاها كانت فى يــوم التنحــى 

صرخة ميدان زلزلت عالم بحاله
صرخة ميدان جلجلت... سمعت حسني وجماله
هرب عياله
ويا المدام
طلع دراعه اليمين
طلع شماله
طلع بيان
طلع وزاره تحلف يمين
قال كلمتين
قتل الشباب جوه الميدان
ظهر وبان .....انكشف....
لا حس ولا حتي انكسف..... وسابها قوام
سفاح ......
فكر بلدنا سداح مداح
فكرنا هنهاب السلاح
داوي الميدان الجراح .....لملم صفوفه
قتل بايده..... في الشعب خوفه
يوم الرحيل ......
علمنا جيل .... معني الحياه
لجلك يسيل .... دمي مياه
كف بكف .... وحدنا صف
شعور امان ما يتوصف
بكل همه.... عدينا أزمه
صحينا أمه ....ليها لزمه
وقولنا مين هم الجناه
مين اللي قتل في الميدان ....و المستفاد
مين اللي كسر البيبان .... و ظلمه ساد
مين المدان ..... ليه العناد
الشعب قرر.... ملكش فيها ابداٌ بيات
مين اللي عتم ع الحقيقه
مين اللي قتل ارواح بريئه
كان حلمها بس تعيش
من غير فساد
كان حلمها تلاقي عيش
ووجوه جداد
وحياتكم انتو ....هنعيش عشانكم
احنا لسانكم
احنا هنهتف بصوتكم وصوتنا
هنكسر قيودنا
من النهارده مفيش رجوع .. ولا حتي هدنه
لو حتي موتنا .... زي ما ماتوا
ما يسبنا بقي ويعيش حياته
صاحي الميدان لسه وثاير
لسه التاريخ رافع الستاير
لجل الجبان الدم فاير
وحدك يا شعب .....
الوقت صعب
لكن اكيد ..... جايه البشاير
.........................

طارق الموجي